Im Keller

von Stefan Loicht

 

Szenerie: Ein junger Mensch betritt ein unter dem Straßenpflaster gelegenes Etablissement; dies in der Absicht, mit dem anderen Menschen, der da unten zugange ist, ins Gespräch zu kommen. Der Andere zeigt sich skeptisch, reserviert und redefreudig zugleich, so wie es den traditionellen Wiener Kommunikationsformen geziemt.

 

„Wos san Se? A Soziowos? A so, a Stadtforscher. Wos ned ollas gibt. Oiso, wos woins? Redn? Kemma mochn, wenns mi ned von der Arbeit ohoidn. Wos dera Oabat is? No, des sengans eh. Im Detail? San se a so a Wisaschist oda Veschidist oda wia des hast? Oda nua grauslich? Na geh, woar a Spaß. Brauchns ned so lackiert aus da Wäsch schaun, se san wirklich ned da Earschte. I waas scho, dass i a Addragzjohn bi. Üwa mei Groddnboh is scho mea kschrim woan ois üwa di im Broda. Sixtas, des kon i, so ren, dass da oide HC, dera Artmann, ned dera ausglutschte Hüfspappnschlossa sei Freid häd.

 

Zur Sache: i hob an Darif. Student? Nua wäus Leanan umasunsd is, bin i s ned a. Vuaschlog: se mochn mei Hokn, dawei dazöö i. Es warad a ned des easte Moi. Se miassn oba a fia das leibliche Wohl soang. Wos des haasd? Na wos zam Saufn hoin. Und zoin. San se leichd ned vo do? A so ana dea glaubt, wäu a do scho in iagandana Brunzhittn si an einebrennt hod, glaubt, ea is ana, dea wos si auskennt? Eich hob i scho kfressn, es zuagrasdn – wia haasd des – Bobo-Oaschlecha. Bomale Kindal, gheat ois zam Brogramm.

 

Damit drücke ich nur aus, das ich durchaus up to date bin.

 

Jezz bisd verwirrt, gö? Huach, in mein Dschob muas ma ned nua olle Klaviera, sundan a de Schpinettn spün kennan. Wos schaustn wiar a Autobus? Wos glaubstn, wos i do siach, hea und a dua? So, Pause, hackl wos! Brav machst as. Nix fagessn. Des a no. Stop, Kundschoft. Schleich di um di Ekn, geh aufe und hoi wos. Wos? Na wos, von dema an Rausch griagt. Frog ned so deppad.

 

Ned obdimal, owa ged. Zum Wohle! Seid won i des moch? Is Saufn oda des, worums do bisd? Scheazzal. No, aungfangan hob i Ende Sibziga. A hohe Zeit! I hob eam no erlebt, do woa er heruntn, gaunz ruig woar a, a Ausstrahlung hod a ghobt, in de Aung hod a ma gschaud und nochha erleichtert ‚Jo, Jo‘ xsogd, do hob I gwussd, mia zwa, mia faschdehn sich. Ein waarllich großer Mann, hoid wia ma so sogd. Von wem i red? Homs da in dei Bildungshian gschissn, du Drottl? Der, bei dem ois no in Ordnung woa. Damals, jo, oiso, en de Schui woid i nimma, Maura oda so woa ma zvü, hod ma da Voda xsogd, gehst zur Partei, di höfn da. Mei oida Herr, dea woar a echta Idealist, ana den unsare Arbeiterkämpfe richtig prägt hom tan. Mia woas jo powidl, eh ois isi, kaum woar i in da Sektion, homs ma a Wohnung odrogn und am näxt bestn Festl de Silvia vuagstellt. Und xsog, mir hom wos fia di, bleibst bei uns, bist und bleibst ein unschätzbar wichtiger Teil der Arbeiterbewegung, hob i ma docht: passt und samma si ealich, an Haxn ausreissn duar i ma do fix ned. Des woas.

 

Und glei donoch is dohn der Tito gschduam. Seitdem is ollas Oasch. Na jo, fosd ned ollas, oba zumindest der Llauf der Wöd. Zerscht der Sinowatz, dea woa iagandwi ondas, dohn Hainburg, ned missverschden, i bin eh a fia de Umwelt, und de Düpn woan eh olle a Gaude. Dera Nenning, wos imma ois a Nockada umaghupft is, am Beidl graue Hoa und a Gweih und de gaunz Lustige med de blaun Hoa und de zwa Noman, des woa scho a Hetz. Wos, de kennans a ned? Eh Wuascht. Wos dohn a echtes Drama woa – und jez wissns scho, dass i a bolidischa Mensch bi – woa da Haida. A, dea sogd ihna wos. Na, na, so woas ned. Des Broblem woa, dos dea xsogd hod, wos mia si olle dengt hom. De Tschuschn san Gfrasda, wengan de Judn sama stia und de Großkopfatan hom des, wos uns gherat.

 

Wos des is? No, de schengan Fraun zam Beischpü. De Silvia woa jo a amal zam Oschau, a fescha Hos, oba jez hoz Gschpasslabaln wia Mandarina in Sokkn. Do frog I mi, wo is de Partei? I find scho, dos ma ane zuasteht, de wos duad, wos ma ia sogd und a ned ausschaud wiar a lungangronka Heislrotz med ana Wampn. Oda de Wohnung? Kost zwoa an Nosnromme, owa ka Dachgeschoss wias de Funktiänöre oda wia des haasd hom. Des is owa ollas Volkseigentum. De Bücha, de wo no nix en eam Lem ghakkld hom, griang in Zukka in Oasch blosn, dawäu mia ealichn Oabeita um unsare Früchte betrogen wern. Des hod da Haida xsogd. Und wäu a recht hod ghobt, hod dera Oaschlochbadei aungfaunan, wos zam dan, wos haasd zam dan, blezzlich woa ois ondas.

 

I maan, wos moch i mid da Badei, wens nix fia mi mochd. I woidad a gscheide Oide, i woidad a gscheide Wohnung, is jo nix wos unmeglich warad und auf amoi song de Fegel, des des so ned ged. Hallo? Zawos bin i bei eich und wö eich? Wengan dem Faschismus leichd? Do homs imma gmand, dea Kompf dageng warad so wichtig. I maan, des hob I ned midgriagd und wenns as ned gibt, kons a ned so wichtig sei. Soin se um mi kümman, ned uma wos, wos iangdwi wuascht is. I brauch kan Kombf wia da Vodan, I wü eam a ned, I wü a ka Scheissparteipolitik, des soin afoch gscheid verwoidn, so wias friacha woa. Woos haasd, Bolidig hod wos med Badein zam tan? Easchtns, wenn zamgramd is, wia bei mia, is des a guade Bolidig. Zweitens, wenn ana wos ondas mochn wü, wos wül a? Ned Zamraman? Sixtas. Ideologie? Kräu ma owa med dem Bledsinn. San doch eh olle gleich. Wödmasda im Veaoaschn. Hosd ma ned zughuacht? I hob nix und de hom ollas. Wos maansd, de san mia? Jo, in ana echtn Demogradi warad des aso. Owa unsare? I hob kan vo de gwöd. I maan scho, owa ned de Basis, wennsd da fuaschdön gonst, vo wos i red. Waasd, in da Sekzion, wo i hob hoid himiassn, des is a uafade Gschichd. Do rens üwa Sochn, de wos mi ned indarassian duan. Und blezzlich is ana fo de Gomiga, de wos i scho in da Schui vadroschn hob a Gemeinderat. Wos isn des fia a Demogradi? Nua wäu dea schen ren kon, hod a an Dschob, woar a nix duan muas. Ois Oaschlecha! De Daheagräudn maan i jez, wäu de Buagamasda woan jo olle bei mia. De kenn i persönlich. De san Wöd. Seidm Gratz. Ka Fezzn ohne mei Gschäfd. Und an Fliaga homs jo dauand ghobd. Da Gratz, a Legende, und allanich der Zilk, a Dauergast in meinem Knast. Wobei, der Häupl, der is goa ned so. Dea is nua blad. Sogoa is Saufn kennan oda diafn is a Opfa vo de Deppadn. Wöche? No, de wos woin, dos a Fleischlabal glikklich gschduam sei muas und bei mia frong, ob i eh a umweltverträglich bi. Aha. Glaubst, des Schdinkkn griagst mim dibedanischn Wachln weg? Mia san a Haus of Schas! Do fäuds! Alles Leben ist Chemie!

 

Moral? Kon ma des saufn? Huacht se on wiar a Margedingschmäh von an Frostschutzimbortäu. Jo eh. Is ned so gmand. Und jezz gib hea is Trangl. Prostata!

 

Owa es is ned ollas schlecht. Oda woa. Schau, i hob mei Gemeindewohnung, ghead eh mia, wonan tuar i nua in Goadn, na, nix Puppnheisl auf da Schmöz. Wos med Kölla und Pul en Schdrasshof, in ana Seitngossn, ned bei de Tachinira fon da Eisnbohn, de wos olle auf de büllichn Öbebegründ inare Faliarahittn stengan hom. Bei mia: Dopplgarasch. Fian Schtean und in Ransch Rowa fon da Äun. Wissns, in Woaheid bin jo a Sozoioarbeita. Wäu dawäu loss I in meina Wohnung Bedürftige wonan. Oame Teife, de wos nix hom und ned wissn, obs bleim diafn. I maan, fo mia aus soin sa se olle schleichn, de Islamhuangfrasda. Terroristen und Vergewoitiga. Kindaschända und Drongdila. Im Ramadan nix fressn, sowiso nix saufn und beim Betn in Oasch ind Heh hoidn wia de Oghazdn. Denan Salatfistn dadad i Zukkaln in Boat pikkn, dass an nix mea glaum. Ois Oaschlecha. Owa meine san suppa. De zoin sovü, dafias mei oids Klo zuascheissn diafn, dass i ma näxts Joa an Tesla kaufn wer. Wäu don hauts de Eisnbona uandlich de Aung ausse. Wea sowos hod, dea hods afoch. Und in Strom griag i eh, ich lliiebe de Gewerkschoft. De hom imma auf mi gschaud, owa manchmoi kennans as a. Hob i amoi an so an Kimmetiak ghobd, dea wos ned de zwöf Schtundn mochn woidad. Sogd dea Beidl, ea ged si beschwean, no, kumman de Horrorklauns wiarglich za mia und maanan wos. Hob i s olle ausseghaud. Wos glaum de Gsichta wers san? Ois Oaschlecha! Na is eh wuaschd. Owa ned dasd glaubst, i hob wos gengan de Jugos oda so. Da Dragan zam Beischpü. Gonz a guada. Voa oim sei Sliwo. Und de Dragica. Vü Hoa, oba a vü Dembrament, ned so fad wias Süwal. De san wöche von uns. Oisadaun, i bin ka Ausländerfeind. Nua de Auslända, des wos ned fon do san, de san ma ned geheua. Woin olle nua unsa, wos haasd unsa, de woin mei Göd. Und dabei vaschleiat sein. Wos unsan schiachn Trampen a ned schond dadad. Oiso i find des lustig. Owa gaunz im Ernst: so gez ned. Wo bleibd n do de Guidua?

 

Heast du xsöchda Off, ned mia deppad kumman! Du wüsd wos fon mia, oiso tu ja nicht meine Kultur in Frage stellen! I ke mi aus. Waasd, a Hawara fon mia, da Schlatznbeaga Koarl, oda, unta Freind, da Schlampn-Karli, woar amoi da Herausgeba vom Fut-Express und is jezz da Obmann vom Lesbenhilfsverein. Dea kennt si a aus. Wos dea von da Guidua dazöd, seavas Kaisa. Sogoa de Jelinek kennd a. Jo eh de mim Nowelbreis. De losd se gean fon eam in Oasch aushaun. Wäu ea so verständnisvoll is. Fiar a gscheide Mari mochd dea ollas. Da Gabalje oda wia dea haasd, sog is des leichd a Froschfressa, egal, waasd eh, dea wos in Ledahosn-Ambros mochd, ged a zu eam. Abrobo, Austropop, dea gfoid ma. Da Fendrich, Ei äm from Ostria, da Özzi, de san a Hit. Uaschdoiz woar i wengan Songkontäst. A Schwuchtel med an Boad, i waas eh, owa i bin da ned a so. Es woa iagendwi so wi mim Hermann Maier. Den vaschdeh i a ned, owa imma wida Estarreich. Jessas, Koadoba. Da Krankl. Und de Kikka von heid? Ois Oaschlecha. Lauta doikade Tschuschn med Pekkaln. Nix reissn und griang a Göd wia da Bokassa, ois des ma glaum kend, se san kane Hundskikka. An jen vo de Fasaga dad i ois a Blinda med an foischn Haxn omondian. Oiso, früha hoid. Owa den Alaba, den mog i. I find, a jeda soid an Murl hom. A Lumumba, des is wos gescheids fia de koide Joreszeid. Mit an Inländerrum. Ochzig Porzend! Des gibds nua bei uns! Owa es Jungan kennts des goa nimma. Saufds nua in Dreck wos vo de Itakka oda de Russn kummt. Wobei, den Putin mog i. Und den Oaban a. A Palazk, des ged. Hod jo amoi uns ghead. De zwa wissen, wia ma mim Ruaß tuan muaß, de san kane foischn Gutmenschn. Do geds zackzack in Hefn, wenn ana ned so duat wiar a soi. Schmähbefreit sans hoid, unsare Ostblokkla. De neman des Korrupte eanst. Woar amoi a so a Russ bei mia, woid mia an Hundada gem, dass a sei Dultschinea in an vo meine Kammaln uandlich betonian kon, hob i gsogd na, is a glei rabiat wuan. Mia doch wuaschd, wos a mid sein aufgsprizdm Gschbusi mochd, owa dera Goidhamsta hod ned üwazukkad, dass des ned so afoch is. Umgangsformen, vaschdehsd! Do muas a zerscht frong. Wia six ghead. Owa wos wüsd mochn, san hoid Mongoln. Hos du gwusd, dass de Ungara a von durtn kumman? Oiso vo iagendwo am hoibn Weg zu de Gschlitzn? Des san de Nega vo Asien! Na, Asien derf ma nimma song, gö? Trotzdem: Wiadschofdsmigrantn! Ois Oaschlecha!

 

Eh Schealokk, jezz glaubsd, du hosd is beafegde Feindbüd gfundn. Kumm, moch a amoi a Schlukkal. Nua, gaunz so is as ned. In mein Gschäfd muasd de Leid meng. Mir is nix Menschliches fremd! Do herund kauns zuage, das da Teife si schenian mechd. Dramen, wos haasd, Tragödien hom se do scho ogschbüd. Beim mia geds jo ned nua um is Köapaliche, wos ma mia ois dazööd, des kon si jo kana vuaschdön. Do san Sochn dabei, do schdöds da ois auf. Wiso de olle auf de Idee kumman, grod bei mia ihnaren Sondamüll zum olodnan, des waas i a ned. Wäu i so a heazigs Gsichd hob? Wäus im Breis inbegriffn is? I glaub jo ned, dass du di midn Kapitalismus auskennsd, owas waasd du, wos a Won-Schdob-Schop is? Des is, wennsd ois auf amoi griagst. So is bei mia. Wia früha beim Pforra. Bedürfnisse, Sündn und Beichtn in an. Des is a Geschäftsmodell!

 

I bi jo nua a klana Gemeindebediensteta, owa Wisjonen hob i scho, wenns ums Fadinan ged. Waasd, in de Nullajoa, do hom an an jen Dog an Mulatschag ghobd, med de Blaun warads gwesn. Oman woid de Gfriesa jo kana seng, woans hoid imma herunt. Des woar a Hetz med denan! Ollawäu wos zam Saufn dabei, is Knedl is eana nua so aussagfoin und midm lustigen Zeigs, wosd sunsd nua beim Dokta griagst, homs umagschmissn. De Buben! Und Weiba woan a dabei. Allanich de ane, wos ausgschaud hod wia da Fips vom Pezi vom Kaschpal, de hod jo nix und neamd auslossn. Amoi hod mia ia Schofföa an Katon brochd und xsogd, i soi eam aufhem. Wos drin woa? A Joaresvorrat Untaflak, zam Wechseln. Drei Monad schbäda woans aus. Se ham zwoa dauand umagread, dass se kana leidn kon, owa wenns in da Wön woan, aba hallo! Wödheaschofd woa des mindeste. Und mein Schnitt hob i gmochd. Auf amoi hob i Wohnungen vermittelt, Dschobs ohne End fia olle hods gem, sogoa dea deppade Autotandla vo da Quönschdrossn woar auf amoi mei besta Hawara.

 

Warum is sowos ned da Badei eigfoin, häd ma olle wos davo ghobd. Owa nix, imma fagessens auf uns klane Leit. Mid mia kon mas jo mochn. Dawäu bin a so a guada Mensch, i hüf imma, wenn i siach, wenn si ana ongsoacht hod oda so. Do hob i an Kostn, do is Ersazgwond für alle Fälle drin. Is jo wohlfeil, won mas ausm Kontäna aussezahd. Und fir an jen, der wos wos zam Sanian brauchd, hob i wos. Ma hüfd jo gean. Und de bissl Unkostn, wos i hob, na, de zoid a jeda freiwüllich, wans bressiad. Do kummd gonz schee wos zam, waasd eh, a so a Pul is ned büllich. Muass ma schaun, dass ma zu wos kummd, is jo ned a so, dass ma wos gschengn griagt. Genau des hod ma ana vo de Bubaln a gsogt, waasd eh, der wos da Supasaubare is. No, wäu ma si faschdondn hom, ea med da weissn Westn und i, Schbezalisd in Sochn Hügjene, hod a ma erklärt, wia des so gangad, dass ma an Betrieb wia mein briwadisian kenndad. Oida, wos fiar a Gschäfd! Oiso, im Dedeil: mia neman wos, des eh kan ghead, des do hoid, wäus olle ghead. Foid ned auf, wens föd. Es gibt an Verdrog, i zoi an Euro, ois is rechdens, dazua gsogd wird, des Risigo drog i. Wos fiar a Risigo? Wos waas denn i! Dos is Wossa bunt wird oda da Lugna Pobst. Is ma wuaschd. Es gfreid si auf jen Foi da Finanzminisda. Und don miassn olle, de wos do wois woin, mia wos zoin. So wia jez. Owa wäus mia ghead, ghoid i ma des Geaschtl. Und wenn wos zam richtn is, sog i, des kon i ma ned leistn, wäu Behöadngschidigschasdi und wäu öffentliches Interesse und don zoid des a no wea. Win-Win, wia ma bei uns in da Nju-Ekomonni song dadad. Da Keisa vo Schdrasshof warad i gwuan! A scheena Draum. Des is ois, wos blim is. Wäus de gschissanan Falottn üwadrim hom, auf meine Kosten! I maan, de Gelegenheid wiad scho wida kumman, owa don bin i zoid. I hob jo a scheene Pensjon, waasd eh, Hakkla und so und is Tennisspün woad scho. Und is goifn. Und de Domrep. Trotzdem: amoi zua Hodwolee ghean, auf Augenhöhe eana song, dass olle Oaschlecha san, des hed ma gfoin.

 

Jez bin i debressif und du bisd schuid, wäusd mi on des ollas arinnad hosd. A Wurd no, befua i di aussehau und mi fia heid final lakkia: Schdö da fua, wos des hed wean kennan. Des do warad jo nua da Ofong gwesn. Scheiß auf des Asfaldflekkal do omad. I hed mid da richdign Schdradegi üwaroi auf dera Wöd sowos aufmoch kennan und brauchad ned vurm Rodhaus vasumpan. A Exbortschlaga! Üwaroi wos aufmaschian und paradian, Minsk, Mekka, Moskau und Pöngjang! Üwaroi en Sutterrein a öffentliche kostenpflichtige Bedürfnisanstalt! Und i warad da Häuslmagnat, da Brunzakenig, da Kloligarch der Roten Plätze!“